15 నుంచి ఎకోరిట్రీట్‌ ఉత్సవాలు

పెదవాల్తేరు, న్యూస్‌టుడే: ఒడిశా పర్యాటక ప్రదేశాలు శీతాకాలపు ఆతిథ్యానికి ఆహ్వానం పలుకుతున్నాయని ఒడిశా పర్యాటక శాఖ అదనపు కార్యదర్శి దుర్గాప్రసాద్‌ మహాపాత్ర్‌ అన్నారు. విశాఖలోని ఓ హోటల్‌లో సోమవారం ఆయన విలేకరుల సమావేశం నిర్వహించి మాట్లాడారు. డిసెంబరు 15 నుంచి ఎకోరిట్రీట్‌ ఉత్సవాలు జరగనున్నాయన్నారు. 3 నెలల పాటు ఈ ఉత్సవాలు కొనసాగుతాయన్నారు. పర్యాటక ప్రదేశాల్లో ఇవి నిర్వహిస్తామన్నారు. జల క్రీడలు, బోటు షికార్లు, జంగిల్‌ ట్రైల్స్‌, సైకిలింగ్‌ టూర్లు వంటివి ఉంటాయన్నారు. నోరూరించే రుచులతో వంటకాలు అందుబాటులో ఉంటాయన్నారు. కార్యక్రమంలో పర్యాటకశాఖ డివిజనల్‌ మేనేజర్‌ పి.కె.చాంద్‌, ఇతర అధికారులు పాల్గొన్నారు.