విషాదంలోనూ దాతృత్వం

పెదవాల్తేరు, న్యూస్‌టుడే: విషాదంలోనూ ఓ కుటుంబం దాతృత్వం చూపింది. మరికొంతమందికి ప్రాణదానం చేసింది. దీనికి సంబంధించి అవయవదాత కుటుంబ సభ్యులు తెలిపిన వివరాలిలా ఉన్నాయి. లావేరు మండలం కేశవరాయునిపాలెంకు చెందిన యతిరాజ్యం రామారావు (62) ఈనెల 2న రణస్థలం మండలం కొచ్చెర్ల గ్రామానికి వెళ్లారు. అక్కడ నడుస్తూ పడిపోయారు. తలకు గాయమైంది. దీంతో అక్కడి వైద్యుల సలహా మేరకు ఈనెల 3వ తేదీ విశాఖ నగరంలోని కేర్‌ ఆసుపత్రిలో చేర్పించారు. తలలో రక్తం గడ్డ కట్టడంతో శుక్రవారం శస్త్రచికిత్స చేశారు. అయినా ఫలితం లేకపోవడంతో వైద్యులు బ్రెయిన్‌డెడ్‌గా నిర్ధారించారు. ఆసుపత్రి వర్గాలు అవయవదానం కోసం కుటుంబ సభ్యులకు అవగాహన కల్పించారు. భార్య రూపవతి, కుమారుడు, కుమార్తె అవయవదానం చేయడానికి అంగీకరించారు. దీంతో గుండెను చెన్నై ఎం.జి.హెచ్‌ ఆసుపత్రికి, కాలేయాన్ని విశాఖపట్నం కేర్‌ ఆసుపత్రికి, నేత్రాలు ఎల్‌.వి.ప్రసాద్‌ కంటి ఆసుపత్రికి తరలించారు.