అనుమతి ఉంటేనే దాణా అమ్మకం

పలాసలో నోటీసులు అందిస్తున్న పశుసంవర్థక శాఖ అధికారి

పలాస, న్యూస్‌టుడే: పశువులు, కోళ్లదాణాతో పాటు పెంపుడు జంతువులకు పెట్టే ఆహారం, ఖనిజ లవణాలు అమ్మాలంటే ఇకపై ప్రభుత్వం నుంచి తప్పనిసరిగా అనుమతి తీసుకోవాల్సి ఉంటుంది. ఈ మేరకు ప్రభుత్వం జి.ఒ. నం.27 పేరిట ఉత్తర్వులు జారీచేసింది. ఈ ఏడాది జనవరి నెల నుంచి దాణా అమ్మే వ్యాపారులంతా జనవరి 31 2022 నాటికల్లా లైసెన్సులు తీసుకోవాలని పశుసంవర్థకశాఖ ఆధ్వర్యంలో నోటీసులు జారీ చేస్తోంది.

మరో పది రోజులే అవకాశం..
జిల్లాలో 252 పశుదాణా అమ్మే దుకాణాలను గుర్తించి నోటీసులు జారీచేశారు. ఇప్పటివరకు 20 మంది వ్యాపారులు దరఖాస్తు చేసుకున్నారు. రిటైల్‌ వ్యాపారులకు ఫీజు చెల్లింపులో కొంతమేర తగ్గింపు కోసం ఎదురుచూసినా ప్రభుత్వం మాత్రం మూడుకేటగిరీల్లోనే వసూలు చేయాలని నిర్ణయించింది. దరఖాస్తుకు మరో 10 రోజులే గడువు మిగిలి ఉంది.

జీవితకాలం రుసుము ఇలా..
జీవితకాలంలో 25 వేల మెట్రిక్‌ టన్నులు అమ్మేవారిని చిన్నతరహాగా పరిగణించి రూ.25 వేలు రుసుం విధించారు. దీన్ని చెల్లించి జీవితకాల అనుమతిని వీరు పొందవచ్చు. 25 వేల నుంచి 50వేల మెట్రిక్‌ టన్నుల వరకు మధ్యతరహాగా పరిగణించి రూ.50 వేలు రుసుం విధించారు. అంతకంటే ఎక్కువ వ్యాపారం చేసేవారంతా రూ.75 వేలు చెల్లించాల్సి ఉంటుంది. పశుసంవర్థకశాఖ ఆధ్వర్యంలో తనిఖీలు చేసి లైసెన్సు తీసుకోని వ్యాపారుల దుకాణాలను సీజ్‌ చేయనున్నారు.

చర్యలు తీసుకుంటాం .. జిల్లాలో లైసెన్సు తీసుకున్న వ్యాపార, ఇతర సంస్థలు మాత్రమే పశుదాణా అమ్ముకోవాలి. గతంలో మాదిరిగా ఎక్కడబడితే అక్కడే అమ్మకాలు చేయాలంటే కుదరదు. నాణ్యమైన పశుదాణా అందించాలనే ఉద్దేశంతో ప్రభుత్వం ఈ లెసైన్సు విధానాన్ని తీసుకొచ్చింది. వచ్చేనెల నుంచి లైసెన్సు లేకుండా అమ్మితే చర్యలు తీసుకుంటాం.

- ఎం.కిశోర్‌, జేడీ, పశుసంవర్థకశాఖ, శ్రీకాకుళం