పురాధ్యక్షుల వార్డులో నీటి కష్టం

ఇచ్ఛాపురం పురపాలక సంఘానికి నాలుగు పర్యాయాలు అధ్యక్ష స్థానాన్ని అందించిన బెల్లుపడ వార్డులో తాగునీటి వెతలే ఈ చిత్రం. నాలుగు అడుగుల గుంతలోకి దిగితే గానీ.. బిందెడు నీరు అందని దుస్థితి. తొలి రెండు పాలక మండళ్ల కాలంలో బెల్లుపడ కొండపై చిన్న రిజర్వాయర్‌ నిర్మించి, కృష్ణసాగర్‌ బావి నుంచి నీరు తోడి ఆ ప్రాంతానికి అందించేవారు. అప్పట్లో గుంతల సమస్య లేదు. బావిలో నీరు ఇంకిపోతోందని దానిని నిలిపివేసి ప్రస్తుతం బాహుదా నీటిని అందిస్తున్నారు. దీంతో నిత్యం ఈ పాట్లు తప్పడం లేదు. బెల్లుపడకు ప్రత్యేక రిజర్వాయర్‌ నిర్మాణానికి ప్రతిపాదించామని, రూ.58 కోట్లతో అమలయ్యే మంచినీటి పథకం ద్వారా సమస్య పరిష్కారం కానుందని పురాధ్యక్షురాలు పిలక రాజలక్ష్మి చెప్పారు.  

- న్యూస్‌టుడే, ఇచ్ఛాపురం