పురుగుల మందు తాగి వ్యక్తి మృతి

జి.సిగడాం, న్యూస్‌టుడే: పున్నం పంచాయతీ ఎల్లయ్యపేటకి చెందిన వి.వెంకటసురేష్‌వర్మ(37) పురుగుల మందు తాగి మృతి చెందాడు. పోలీసులు తెలిపిన వివరాలిలా ఉన్నాయి. సురేష్‌వర్మ సోమవారం వేకువజామున గ్రామ సమీపంలోని సర్వేశ్వర పురం కూడలి వద్ద పురుగుల మందు తాగి ఇంటికి ఫోన్‌ చేసి విషయం చెప్పాడు. కుటుంబ సభ్యులు హుటాహుటిన అక్కడికి చేరుకుని పరిశీలించగా పొలాల్లో పడి ఉన్నాడు. వెంటనే చీపురుపల్లి ఆసుపత్రికి తీసుకెళుతుండగా మార్గమధ్యంలో మృతిచెందాడు. పిల్లలు లేకపోవడం, మద్యానికి బానిసకావడం, ఆర్థిక ఇబ్బందుల కారణంగా ఆత్మహత్యకు పాల్పడినట్లు జి.సిగడాం ఎస్‌ఐ సీహెచ్‌ రామారావు తెలిపారు. కేసు నమోదు చేసి దర్యాప్తు చేస్తున్నట్లు చెప్పారు.