రైతుల ‘సేతు’లతో నిర్మాణం

కొండిరేవు వద్ద ఏర్పాటు చేసుకున్న రహదారి

సోంపేట, న్యూస్‌టుడే: దశాబ్దాలుగా హామీలకే పరిమితమైన బారువ మేజర్‌ పంచాయతీలోని వంతెన నిర్మాణాన్ని అన్నదాతలు శ్రమదానంతో పాటు సొంతంగా నిధులు సమకూర్చుకొని పూర్తి చేశారు. పంచాయతీ ప్రజలు పొలాలు, మంచినీటి బావులకు వెళ్లాలంటే కొండిరేవు కాలువ దాటాలి. తీర ప్రాంతంలోని ఉప్పలాం, గొల్లూరు, మామిడిపల్లి, సిరిమామిడి పంచాయతీల పరిధిలోని గ్రామాల ప్రజలు ఈ మార్గంలోనే బారువ, సోంపేట వెళుతుంటారు. బారువలో ఉన్నతపాఠశాల, జూనియర్‌, డిగ్రీ కళాశాలల్లో చదివే తీరప్రాంతం, ఉద్దానం గ్రామాల విద్యార్థులు, ఇతరులు ఆ కాలువ వద్ద ఇబ్బందులు పడేవారు. మూడు దశాబ్దాల కిందట వంతెన నిర్మాణానికి శంకుస్థాపన చేసి వదిలేశారు. ఆ తరువాత పనులు అటకెక్కాయి. మహేంద్రతనయపై వంతెన నిర్మాణంతో కొండిరేవు పనులు చేసేందుకు మూడేళ్ల క్రితం నాబార్డు నిధులు మంజూరయ్యాయి. ఎన్నికలు రావడం, తరువాత జరిగిన పరిణామాలతో ఎక్కడ పనులు అక్కడే నిలిచిపోగా రైతులే ముందుకొచ్చి వంతెన ఏర్పాటు చేసుకున్నారు. ఎకరాకు కొంత మొత్తం అంటూ విరాళాలు సమకూర్చుకొని రూ.1.5 లక్షలతో పైగా పటిష్టమైన సేతువు, రోడ్డు నిర్మించారు. పాలకుల నిర్వాకంతో విసిగిపోయి చివరకు తామే నిర్మించుకున్నామని రైతుసంఘం నాయకుడు కర్రి సత్యం పేర్కొన్నారు.