భూసేకరణ త్వరితగతిన పూర్తిచేయాలి: కలెక్టర్‌

కలెక్టరేట్‌(శ్రీకాకుళం), న్యూస్‌టుడే: భూసేకరణ పనులను త్వరితగతిన పూర్తిచేయాలని కలెక్టర్‌ శ్రీకేష్‌ బి.లఠ్కర్‌ ఆదేశించారు. కలెక్టరేట్‌లో శుక్రవారం ఆయన ఇరిగేషన్‌, రెవెన్యూ అధికారులతో సమీక్షించారు. ఈ సందర్భంగా మాట్లాడుతూ భూసేకరణకు నిధుల సమస్య లేనందున పనులు వేగవంతం చేయాలని, క్షేత్రస్థాయిలో ఇబ్బందులు ఉంటే తమ దృష్టికి తీసుకురావాలని సూచించారు. భూ సేకరణలో తహసీల్దార్ల సహకారం తీసుకోవాలని, రైతులతో చర్చించి సమస్యలను పరిష్కరించాలన్నారు. పెండింగ్‌లో ఉన్న సమస్యలను భూసేకరణ ఉప కలెక్టర్లు వివరించారు. ఇరిగేషన్‌ పనులను వేగవంతం చేయాలని వంశధార ఎస్‌ఈ డోల తిరుమలరావును ఆదేశించారు. ఈ సమావేశంలో జేసీ ఎం.విజయసునీత, భూసేకరణ, ప్రత్యేక ఉప కలెక్టర్లు తదితరులు పాల్గొన్నారు.