‘సొంతింటి కల నిజం చేయడమే లక్ష్యం’

పట్టా పంపిణీ చేస్తున్న మంత్రి అప్పలరాజు

పలాస, న్యూస్‌టుడే: రాష్ట్రంలో ప్రతి ఒక్కరికి సొంతింటి కల నిజం చేయాలనే లక్ష్యంతో ముఖ్యమంత్రి వై.ఎస్‌.జగన్‌మోహన్‌రెడ్డి ఉన్నారని మంత్రి సీదిరి అప్పలరాజు అన్నారు. పలాస-కాశీబుగ్గ పురపాలక సంఘంలో టిడ్కో ఇళ్లు రాని లబ్ధిదారులకు జగనన్నకాలనీలో స్థలం కేటాయిస్తూ పట్టాలను కాశీబుగ్గ ఉన్నత పాఠశాల ఆవరణలో బుధవారం సాయంత్రం పంపిణీ చేశారు. గత ప్రభుత్వం మీ అందరి చేత రూ.50 వేలు, లక్ష చొప్పున కట్టించుకుని ఇళ్లు ఇవ్వకుండా మాయమాటలు చెప్పిందని, మీ ఆవేదన ముఖ్యమంత్రి వద్దకు తీసుకుని వెళ్లి స్థలం ఇచ్చేలా చూశామన్నారు. పట్టాలు కొంతమందికి రాలేదని స్థలం మాత్రం కేటాయించామని, వారుకూడా అధికారులను సంప్రదించి ఇంటి నిర్మాణాలు చేసుకోవచ్చునని మంత్రి వివరించారు. మీరంతా కట్టిన డబ్బులు తిరిగి వచ్చేలా కృషి చేస్తామని తెలిపారు. పురపాలక సంఘం అధ్యక్షుడు బళ్ల గిరిబాబు, తదితరులు పాల్గొన్నారు.