పోర్టు నిర్మిత గ్రామాల్లో చురుగ్గా సర్వే

మూలపేటలో సర్వే చేస్తున్న అధికారులు

సంతబొమ్మాళి, న్యూస్‌టుడే: సంతబొమ్మాళి మండలంలోని రాజాపురం రెవెన్యూ పరిధిలోని మూలపేట, లింగూడు, రాజపురం, విష్ణుచక్రం గ్రామాల పరిధిలో గత నాలుగు రోజులుగా భావనపాడు పోర్టు సర్వే పనులు వేగంగా జరుగుతున్నాయి. భావనపాడు పోర్టు నిర్మాణానికి 1010 ఎకరాలు అవసరం. ఇందులో గరిష్టంగా ప్రభుత్వ భూమే ఉన్నా, అది తరతరాలుగా రైతుల అధీనంలో ఉంది. ఈ ప్రాంతంలో రైతుల నుంచి 420 ఎకరాల జిరాయితీ భూమి సేకరించాల్సి ఉంది. పోర్టు నిర్మాణానికి సంబంధించిన సర్వేలు, కార్యకలాపాలు జోరుగా జరుగుతున్నాయి. ఈనెల 17, 18 తేదీల్లో భావనపాడు ఓడరేవు భూ సర్వేను మూలపేట, విష్ణుచక్రం గ్రామస్థులు అడ్డుకున్న విషయం తెలిసిందే. దీంతో టెక్కలి ఆర్డీవో ఆదేశాలతో మండల సర్వేయర్‌ సూర్యనారాయణ ఆధ్వర్యంలో 10 మంది గ్రామ సచివాలయ సర్వేయర్లు ప్రైవేటు, ప్రభుత్వ భూముల్లో సర్వే పాయింట్లు గుర్తిస్తున్నారు. ప్రభుత్వ భూముల్లో ఏమేరకు రైతుల అధీనంలో ఉన్నాయి, వారి వివరాలడిగి తెలుసుకుంటున్నారు.