సమావేశాలకు మొక్కుబడిగా రావొద్దు

ఉద్యోగులపై ఈపీడీసీఎల్‌ సీఎండీ సంతోషిరావు ఆగ్రహం

సిబ్బందితో సమీక్షిస్తున్న సీఎండీ సంతోషిరావు, చిత్రంలో ఇతర అధికారులు

గుజరాతీపేట(శ్రీకాకుళం), న్యూస్‌టుడే: విధి నిర్వహణలో నిర్లక్ష్యం వహించేవారిపై చర్యలు తప్పవని తూర్పు ప్రాంత విద్యుత్తు పంపిణీ సంస్థ (ఈపీడీసీఎల్‌) సీఎండీ కె.సంతోషిరావు హెచ్చరించారు. జిల్లా కేంద్రంలోని ఈపీడీసీఎల్‌ సర్కిల్‌ కార్యాలయంలో శుక్రవారం శ్రీకాకుళం, టెక్కలి డివిజన్ల ఇంజినీర్లతో సమీక్ష నిర్వహించారు. ఈ సందర్భంగా ఆయన మాట్లాడుతూ నెలవారీగా నిర్వహించే సమన్వయ కమిటీ సమావేశాలు మొక్కుబడిగా జరుగుతున్నాయన్నారు. ఇక నుంచి సమావేశాలకు వచ్చేటపుడు గత నెలలో తీసుకున్న నిర్ణయాలు, వాటి అమలు ఎంత వరకు వచ్చాయో తెలిపే నివేదికలతో రావాలని సూచించారు. మొక్కుబడిగా రావొద్దన్నారు. సిబ్బంది పని చేసినా చేయకపోయినా 80 శాతం బిల్లులు వసూలవుతాయని, మిగిలిన 20 శాతం కోసమే కృషి చేయాల్సి ఉంటుందన్నారు. అది కూడా సాధించలేకపోవడమేమిటని అసహనం వ్యక్తం చేశారు. వినియోగదారుల నుంచి వచ్చిన ఫిర్యాదులను తక్షణమే పరిష్కరించాలని చెప్పారు. ఎస్‌ఈ కె.చలపతిరావు, తదితరులు పాల్గొన్నారు.