మహిళల్లో చైతన్యం తేవాలి

అధికారులతో చర్చిస్తున్న జేసీ విజయసునీత

కలెక్టరేట్‌(శ్రీకాకుళం), న్యూస్‌టుడే: జిల్లాలోని స్కానింగ్‌ కేంద్రాలపై నిఘా పెంచాలని జేసీ ఎం.విజయసునీత పేర్కొన్నారు. కలెక్టరేట్‌లో పీసీపీఎన్‌డీటీ యాక్ట్‌పై పలువురు అధికారులతో శుక్రవారం సమీక్ష సమావేశం నిర్వహించారు. ఈ సందర్భంగా ఆమె మాట్లాడుతూ జిల్లాలో కొన్ని చోట్ల బాల్యవివాహాలు, భ్రూణహత్యలు జరుగుతున్నట్లు తెలిసిందన్నారు. మహిళల్లో చైతన్యం తీసుకురావాల్సిన అవసరం ఉందన్నారు. ఆడ, మగ నిష్పత్తిలో జిల్లా మెరుగ్గా ఉన్నప్పటికీ అవగాహన కార్యక్రమాలను చేపట్టాలని సూచించారు. సమావేశంలో జిల్లా సెకండ్‌ అడిషనల్‌ జడ్జి జి.చక్రపాణి, అదనపు ఎస్పీ టి.పి.విఠలేశ్వర్‌, డీఎంహెచ్‌వో డా.బి.మీనాక్షి, జిల్లా మాస్‌మీడియా అధికారి పైడి వెంకటరమణ, తదితరులు పాల్గొన్నారు.