గడ్డకట్టిన నిర్లక్ష్యం

బారువ ప్రభుత్వ బాలుర ఉన్నత పాఠశాల నాడు-నేడు పనుల కోసం తెచ్చిన సిమెంటు ఇది. వినియోగించకుండా వదిలేయడంతో ఇలా గడ్డకట్టి వృథా అయింది. రెండేళ్ల కిందట మొదటి విడతలో ఈ పాఠశాల అభివృద్ధికి ‘నాడు-నేడు’ పనులకు తెప్పించారు. సిమెంట్‌, ఇతర సామగ్రి సరఫరా చేసిన తరువాత పాఠశాల యాజమాన్య కమిటీలో వివాదాలు రావడంతో పనులు జరగకపోగా గదుల్లోనే మూడొందలకు పైగానే బస్తాలు ఉంచేశారు. ఇందులో కొన్ని మాయం కాగా మిగిలినవి ఇలా తయారయ్యాయి. కనీసం వీటిని ఇతర పాఠశాలలకు ఇచ్చేసినా ఉపయోగపడేవి. ప్రధానోపాధ్యాయుడు భానుప్రకాష్‌ మాట్లాడుతూ తాను బాధ్యతలు తీసుకునే సరికే ఈ పరిస్థితి ఉందని, విషయాన్ని అధికారులకు తెలియజేశానన్నారు. రెండో విడతలో పనులు ప్రారంభించామన్నారు.  - న్యూస్‌టుడే, సోంపేట