శ్రీకాకుళం జిల్లా కేంద్రంలో కిడ్నాప్‌ కలకలం

శ్రీకాకుళం (నేరవార్తలు): శ్రీకాకుళం జిల్లా కేంద్రంలో బుధవారం ఉదయం ఓ వైద్యుడి కిడ్నాప్‌ వ్యవహారం కలకలం సృష్టించింది. శ్రీకాకుళం నుంచి విజయనగరం రోడ్డులో ఉన్న హాస్పిటల్‌ వైద్యుడిని ఇద్దరు వ్యక్తులు కిడ్నాప్‌నకు యత్నించారు. వివరాల్లోకి వెళితే.. ఓ ప్రైవేటు ఆస్పత్రి యజమాని గూడెన సోమేశ్వరరావు తన ఇంటి మెట్లు దిగుతుండగా.. ఇద్దరు వ్యక్తులు వచ్చి ఆయనపై వస్త్రం కప్పి అపహరించే ప్రయత్నం చేశారు. వెంటనే అప్రమత్తమైన సోమేశ్వరరావు వారిని బలంగా తోసేశారు. దీంతో వారు మెట్లపై పడిపోయారు. సోమేశ్వరరావు కేకలు వేయడంతో ఆస్పత్రి సిబ్బంది బయటకు వచ్చారు. నిందితుల్లో ఒకరైన రాజు వెంట తెచ్చుకున్న కారులో పారిపోగా.. మరో నిందితుడు పరమేశ్‌ స్థానికులకు చిక్కాడు. దీంతో రెండో పట్టణ పోలీసులు పరమేశ్‌ను స్టేషన్‌కు తరలించారు. మరో నిందితుడు రాజు కోసం గాలిస్తున్నారు.