చంద్రబాబును సీఎం చేసేవరకూ విశ్రమించొద్దు

అచ్చెన్నాయుడును సత్కరిస్తున్న రాష్ట్ర సాధికారత కమిటీ డైరెక్టర్లు

గుజరాతీపేట(శ్రీకాకుళం), న్యూస్‌టుడే: చంద్రబాబునాయుడిని ముఖ్యమంత్రిగా చేసేంత వరకు నాయకులు, కార్యకర్తలు విశ్రమించకూడదని తెదేపా రాష్ట్ర అధ్యక్షుడు కింజరాపు అచ్చెన్నాయుడు కోరారు. ఇటీవల నియమితులైన కాపు, శిష్టకరణ, దేవాంగ, విశ్వబ్రాహ్మణ సాధికార కమిటీ డైరెక్టర్లు పాండ్రంకి శంకర్‌, గుత్తు చిన్నారావు, పట్నాయకుని మధుసూదనరావు, పట్నాల పార్వతీశం తదితరులు సోమవారం నిమ్మాడలోని ఇంటికి వెళ్లి ఆయన్ని శాలువతో సత్కరించారు. ఈ సందర్భంగా అచ్చెన్నాయుడు మాట్లాడుతూ సాధికార కమిటీ డైరెక్టర్లుగా నియమితులైన వారంతా తెదేపా చేపట్టిన అభివృద్ధి, సంక్షేమ పథకాలను ప్రజలకు వివరించాలన్నారు. వైకాపా అధికారంలోకి వచ్చిన మూడున్నరేళ్లలో అన్నింటా విఫలమైందనేది వివరించాలన్నారు. పార్టీ జిల్లా ఉపాధ్యక్షుడు పీఎంజే బాబు, జిల్లా అధికార ప్రతినిధి ముద్దాడ కృష్ణమూర్తినాయుడు, ఐటీడీపీ జిల్లా అధ్యక్షుడు ప్రధాన విజయరాం, తెలుగురైతు రాష్ట్ర ప్రధాన కార్యదర్శి చింతు సుధాకర్‌ తదితరులు పాల్గొన్నారు.