చిన్నారి మృతిపై ఆందోళన

గుజరాతీపేట(శ్రీకాకుళం), న్యూస్‌టుడే: జిల్లా కేంద్రంలోని ప్రభుత్వ సర్వజనాసుపత్రిలో సోమవారం రాత్రి 45 రోజుల వయసున్న బాబు చనిపోవడంతో బంధువులు ఆందోళన చేపట్టారు. సీతంపేటకు చెందిన శోభారాణి కుమారుడు నాలుగు రోజుల కిందట శ్వాస తీసుకోవడంలో ఇబ్బంది పడుతుండటంతో సర్వజనాసుపత్రికి చికిత్స కోసం తీసుకొచ్చారు. మూడు రోజులైనా కోలుకోకపోవడంతో వేరే ఆసుపత్రికి తీసుకువెళతామని కోరినప్పటికీ బాబు ఆరోగ్యం బాగుందని వైద్యులు చెప్పడంతో ఊరుకున్నారు. సోమవారం డిశ్చార్జి చేయాలని కోరగా చనిపోయాడని చెప్పారని బాధిత బంధువుల వెంకటరావు, సత్యనారాయణ వాపోయారు. ఇక్కడ వైద్యం ఎవరు చేస్తున్నారో అర్థం కావడం లేదని మండిపడ్డారు. వేరే ఆసుపత్రికి తీసుకెళతామంటే వద్దనడంతోనే సమస్య ఏర్పడి బాబు చనిపోయాడని ఆవేదన వ్యక్తం చేశారు. ఈ విషయాన్ని ‘న్యూస్‌టుడే’ ఆసుపత్రి సూపరింటెండెంట్‌ స్వామినాయుడు వద్ద ప్రస్తావించగా ఈ ఘటనపై విచారణ చేయిస్తామన్నారు.