పార్టీ కార్యాలయంపై దాడి చేస్తే చర్యలేవి: జనసేన

అంబేడ్కర్‌ విగ్రహం వద్ద నినాదాలు చేస్తున్న జనసేన శ్రేణులు

టెక్కలి పట్టణం, న్యూస్‌టుడే: టెక్కలి పట్టణంలో జనసేన నేతలు శనివారం నిరసనకు దిగారు. పార్టీ కార్యాలయంపై దాడి జరిగి 42 రోజులు గడుస్తున్నా నిందితులపై పోలీసులు ఎటువంటి చర్యలు తీసుకోలేదని ఆ పార్టీ నియోజకవర్గ ఇన్‌ఛార్జి కణితి కిరణ్‌కుమార్‌ ఆవేదన వ్యక్తం చేశారు. టెక్కలి అంబేడ్కర్‌ కూడలిలో అంబేడ్కర్‌ విగ్రహానికి పూలమాల వేసి నివాళులర్పించారు. అనంతరం శ్రేణులతో కలిసి పోలీస్‌స్టేషన్‌కు చేరుకుని సీఐ సూర్యచంద్రమౌళికి వినతిపత్రం అందజేశారు. ఈ సందర్భంగా నల్లచొక్కాలు ధరించి నినాదాలు చేశారు. పార్టీ కార్యాలయంపై దాడి చేసిన వారిని తక్షణమే అదుపులోకి తీసుకుని కేసు నమోదు చేయాలని డిమాండు చేశారు. జనసైనికులు పెద్దఎత్తున పాల్గొన్నారు.