ధాన్యం కొనుగోళ్లలో నిర్లక్ష్యం వద్దు: స్పీకర్‌

ధాన్యం కొనుగోలు కేంద్రాన్ని ప్రారంభిస్తున్న స్పీకర్‌ తమ్మినేని సీతారాం

సరుబుజ్జిలి, న్యూస్‌టుడే: ధాన్యం కొనుగోళ్లలో అధికారులు నిర్లక్ష్యంగా వ్యవహరించరాదని, ఈ విషయంలో ఫిర్యాదులు వస్తే సహించేదిలేదని శాసనసభాపతి తమ్మినేని సీతారాం అన్నారు. మండల కేంద్రంలోని తమ్మినేని శ్రీరామ్మూర్తి కళాప్రాంగణంలో డీసీఎంఎస్‌ ఏర్పాటు చేసిన కొనుగోలు కేంద్రాన్ని శనివారం ఆయన ప్రారంభించారు. రైతులు పండించిన ప్రతి ధాన్యపు గింజా కొనుగోలు చేయాలన్నారు. ఈ విషయంలో రైతులు అపోహలు వీడాలన్నారు. రైతు భరోసా కేంద్రాల వద్ద ఫిర్యాదుల విభాగం బాక్స్‌ను ఏర్పాటు చేయాలని సూచించారు. అంతకు ముందు రీసర్వే భూహక్కు పత్రాలను రైతులకు అందజేశారు. జడ్పీటీసీ సభ్యుడు ఎస్‌.నాగేశ్వరరావు, మాజీ ఎంపీపీ కేవీజీ సత్యనారాయణ, పీఏసీఎస్‌ అధ్యక్షుడు కె.చంద్రశేఖర్‌, మండల పార్టీ కన్వీనర్‌ బి.మల్లేశ్వరరావు, బి.చామంతి, తహసీల్దార్‌ బి.రమేష్‌కుమార్‌, ఏడీఏ బి.రాజగోపాలరావు, ఏవో పద్మనాభం, తదితరులు పాల్గొన్నారు.