చిలకపాలెం టోల్‌గేట్‌ ఎత్తివేత

ఎచ్చెర్ల, న్యూస్‌టుడే: ఎచ్చెర్ల మండలం చిలకపాలెం వద్ద 16వ నంబరు జాతీయ రహదారిపై  టోల్‌గేట్‌ కార్యకలాపాలు బుధవారం అర్ధరాత్రి నుంచి నిలిపివేస్తున్నట్లు పేర్కొంటూ ఎన్‌హెచ్‌ఏఐ పీడీ పి.శివశంకర్‌ ఉత్తర్వులు జారీచేశారు. 60 కిలోమీటర్ల పరిధిలో ఒకటికి మించి టోల్‌ వసూలు కేంద్రాలు ఉంటే ఎత్తివేయాలని ఇటీవల కేంద్ర ఉపరితల రవాణాశాఖమంత్రి నితిన్‌ గడ్కరీ చేసిన ప్రకటించిన విషయం  తెలిసిందే. జాతీయరహదారి విస్తరణలో భాగంగా 2007లో చిలకపాలెంలో టోల్‌గేట్‌ను ఏర్పాటు చేశారు. ఇక్కడ 107 మంది వివిధ హోదాల్లో పని చేస్తున్నారు. రోజుకు సరాసరి రూ.22 లక్షల టోల్‌ వసూలయ్యేదని నిర్వాహకులు తెలియజేశారు. ఈ నిర్ణయంతో స్థానికంగా పనిచేస్తున్న వారంతా రోడ్డున పడతారని సీఐటీయూ జిల్లా ప్రధానకార్యదర్శి పి.తేజేశ్వరరావు తెలిపారు. మడపాం, నాతవలస టోల్‌గేట్‌ల వద్ద వీరిని సర్దుబాటు చేసి న్యాయం చేయాలని కోరుతూ గురువారం ధర్నా నిర్వహించనున్నట్లు ఆయన పేర్కొన్నారు.