ఉద్దానం వాసులంతా కిడ్నీ పరీక్షలు చేయించుకోవాలి

మాట్లాడుతున్న జిల్లా ప్రధాన న్యాయమూర్తి జునైద్‌ అహ్మద్‌ మౌలానా

శ్రీకాకుళం లీగల్‌ న్యూస్‌టుడే: ఉద్దానం ప్రాంతానికి చెందిన ప్రతి వ్యక్తి విధిగా కిడ్నీ వ్యాధి పరీక్షలు చేయించుకోవాలని జిల్లా న్యాయసేవాధికార సంస్థ అధ్యక్షుడు, జిల్లా ప్రధాన న్యాయమూర్తి జునైద్‌ అహ్మద్‌ మౌలానా సూచించారు. జిల్లా కేంద్రంలోని తన కార్యాలయంలో శనివారం మాట్లాడుతూ ఉద్దానం ప్రాంతాన్ని ఎన్నో ఏళ్లుగా పీడిస్తోన్న సమస్య పరిష్కారానికి సామాజిక, మానవతా దృక్పథంతో కలిసికట్టుగా కృషి చేయాలని చెప్పారు. ఇప్పటివరకు జిల్లా న్యాయసేవాధికార సంస్థ ఆధ్వర్యంలో ఉద్దానంలోని నాలుగు మండలాల్లో మూడు వైద్య శిబిరాలు, మూడు న్యాయ విజ్ఞాన సదస్సులు ఏర్పాటు చేశామన్నారు. వ్యాధిగ్రస్థులు మందులు క్రమం తప్పకుండా వాడాలన్నారు. కార్యక్రమంలో సంస్థ కార్యదర్శి ఆర్‌.సన్యాసినాయుడు పాల్గొన్నారు.