ఇంధనం అయిపోవడంతో పడిపోయిందట!

నౌపడ పోలీస్‌స్టేషన్‌ ఆవరణలో ఉంచిన డ్రోన్‌

సంతబొమ్మాళి మండలం భావనపాడు తీరంలో మత్స్యకారులకు పట్టుబడిన జెట్ డ్రోన్‌ను భావనపాడు మెరైన్‌ సీఐ దేవుళ్లు, ఏఎస్‌ఐ ఎంఆర్‌కే రెడ్డి గురువారం స్వాధీనం చేసుకున్నారు. ఒడిశా రాష్ట్రం గోపాల్‌పూర్‌లో జనవరి 28న యూజర్‌ ట్రయల్‌లో భాగంగా ఫైటర్‌ ఎయిర్‌క్రాఫ్ట్‌ మిసైల్‌ నుంచి ఈ డ్రోన్‌ను కొట్టేందుకు ప్రయత్నించగా ఈ ప్రయోగం విఫలమై కూలిందని సంస్థ ప్రతినిధులు తెలిపారు. ఇది ఆర్మీ ఆయుధ వ్యవస్థ సామర్థ్యాన్ని అంచనా వేయడానికి ఉద్దేశించిందన్నారు. ఈ నమూనా డ్రోన్‌ను 45 నిమిషాల్లో వైమానిక వాహనం ద్వారా ధ్వంసం చేయాలని.. అయితే ఇంతలోనే జెట్‌ డ్రోన్‌లో ఇంధనం అయిపోవడంతో భావనపాడు సముద్ర తీరంలో అది పడిపోయిందని వివరించారు. వీటిని అప్పగించాలని సంస్థ ప్రతినిధులు కోరినప్పటికీ డీఆర్‌డీఏ అధికారుల సమక్షంలో అందజేస్తామని పోలీసులు చెప్పారు. నౌపడ పోలీస్‌స్టేషన్‌ ఆవరణలో ఉన్న డ్రోన్‌ను ఉన్నతాధికారులు ఆదేశాల మేరకు తిరిగి భావనపాడు మెరైన్‌ పోలీస్‌స్టేషన్‌కు తరలించారు.

న్యూస్‌టుడే, సంతబొమ్మాళి