88 చెరువుల్లో అమృత్‌ సరోవర్‌ పనులు

కొత్తూరుపేటలో చెరువు పనులను పరిశీలిస్తున్న పీడీ చిట్టిరాజు

లావేరు, న్యూస్‌టుడే: ఉపాధిహామీ పథకంలో భాగంగా జిల్లాలో అమృత్‌ సరోవర్‌ పథకం కింద 88 చెరువులను అభివృద్ధి చేస్తున్నట్లు డ్వామా పీడీ జి.వి.చిట్టిరాజు తెలిపారు. లావేరు మండలం పెద్దకొత్తపల్లి పంచాయతీ కొత్తూరుపేట గ్రామంలో అమృత్‌ సరోవర్‌ పథకం కింద పనులు జరుగుతున్న చెరువును శనివారం ఆయన పరిశీలించారు. 88 చెరువులకుగానూ రూ.7.90 కోట్లు నిధులు మంజూరైనట్లు పేర్కొన్నారు. వీటిలో 14 పూర్తికాగా, 57 చోట్ల పనులు జరుగుతున్నాయని తెలిపారు. మరో 17 చెరువుల్లో ప్రారంభించాల్సి ఉందన్నారు. ప్రతి ఒక్కరికి 100 రోజులు పని కల్పించాలని సిబ్బందిని ఆదేశించారు. కార్యక్రమంలో ఏపీడీ శైలజ, ఏపీవో సత్యవతి, ఈసీ లెనిన్‌బాబు, సాంకేతిక, క్షేత్ర సహాయకులు పాల్గొన్నారు.