కదంతొక్కిన అంగన్‌వాడీలు

కలెక్టర్‌ కార్యాలయం వద్ద బైఠాయించి నినాదాలు చేస్తున్న అంగన్‌వాడీ కార్యకర్తలు

అంగన్‌వాడీలు కదం తొక్కారు. కనీస వేతనాలను అమలు చేయాలని, దీర్ఘకాలంగా ఉన్న సమస్యలను తక్షణమే పరిష్కరించాలని డిమాండు చేశారు. ఈ మేరకు సోమవారం కలెక్టరేట్‌కు భారీ ర్యాలీగా తరలివచ్చారు. ప్రధాన ద్వారం వద్ద బైఠాయించారు. ఈ సందర్భంగా వారు మాట్లాడుతూ ముఖ హాజరును రద్దు చేయాలని, కేంద్రాల్లో వసతులు సమకూర్చాలని, విద్యుత్తు బిల్లులు చెల్లించాలని, టీఏ, డీఏ బకాయిలు ఇవ్వాలని డిమాండు చేశారు. అనేక రకాల యాప్‌లను తీసుకొచ్చి పనిభారం పెంచుతున్నారని, అందుకుతగ్గ వేతనాలు మాత్ర ఇవ్వడం లేదన్నారు. గతంలో ఇచ్చిన చరవాణులు నాసిరకంగా ఉన్నాయని, వాటి స్థానంలో కొత్తవి ఇవ్వాలన్నారు. రాజకీయ వేధింపులు ఆపాలని, ర్యాలీలు, సభలను నిషేధిస్తూ రాష్ట్ర ప్రభుత్వం విడుదల చేసిన జీవోను ఉపసంహరించుకోవాలని కోరారు. అంగన్‌వాడీ వర్కర్స్‌, హెల్పర్స్‌ యూనియన్‌ జిల్లా అధ్యక్షురాలు సుధ, సీఐటీయూ జిల్లా అధ్యక్ష, ప్రధాన కార్యదర్శులు సీహెచ్‌ అమ్మన్నాయుడు, పి.తేజేశ్వరరావు, ఇతర నాయకులు పాల్గొన్నారు.
న్యూస్‌టుడే, కలెక్టరేట్‌(శ్రీకాకుళం)