గంజాయి అక్రమ రవాణాపై ఉక్కుపాదం: ఎస్పీ

మాట్లాడుతున్న ఎస్పీ రాధిక

శ్రీకాకుళం నేరవార్తావిభాగం, న్యూస్‌టుడే: జిల్లాలో గంజాయి అక్రమ రవాణాపై ఉక్కుపాదం మోపాలని ఎస్పీ జి.ఆర్‌.రాధిక పోలీసు అధికారులను ఆదేశించారు. జిల్లాలో రోడ్డు ప్రమాదాల నివారణ, నేరాల నియంత్రణపై జిల్లా పోలీసు కార్యాలయంలో అధికారులతో బుధవారం సమీక్షా సమావేశం నిర్వహించారు. ఈ కేసుల్లో గతంలో అరెస్టయినవారిలో మార్పు రాకుంటే వారిపై పీడీ చట్టం కింద కేసులు నమోదు చేయాలని చెప్పారు. రోడ్డు ప్రమాదాల నివారణకు ఎక్కడికక్కడ హెచ్చరిక బోర్డులను ఏర్పాటు చేయాలన్నారు. వ్యాపార సముదాయాలు, బ్యాంకులు, ఏటీఎంల వద్ద నిఘా కెమెరాలు ఏర్పాటు చేయాలని తెలిపారు. అదనపు ఎస్పీ టి.పి.విఠలేశ్వర్‌, ఎస్‌బీ డీఎస్పీ ఎస్‌.బాలరాజు, సీఐలు, ఎస్‌ఐలు పాల్గొన్నారు.

నిఘా పెంచండి

కలెక్టరేట్(శ్రీకాకుళం): మత్తు పదార్థాలు, మాదక ద్రవ్యాల విక్రయాలపై నిఘా పెంచాలని కలెక్టర్‌ శ్రీకేష్‌ బి.లఠ్కర్‌ ఆదేశించారు. కలెక్టరేట్‌లో బుధవారం జాయింట్ యాక్షన్‌ ప్లాన్‌ అమలుపై సమావేశం నిర్వహించారు. విద్యాసంస్థల గోడలపై టోల్‌ ఫ్రీ నంబరు 14500ను ప్రదర్శించాలని సూచించారు. ఇందుకు స్వచ్ఛంద సంస్థల సహకారం తీసుకోవాలని చెప్పారు. మద్యం దుకాణాల్లో సీసీ కెమెరాలను ఏర్పాటు చేయాలని ఆదేశించారు. మైనర్లకు మద్యం, పొగాకు, గంజాయి విక్రయించకుండా చర్యలు చేపట్టాలన్నారు. ఎస్పీ జి.ఆర్‌.రాధిక, అదనపు ఎస్పీ విఠలేశ్వర్‌, ఎస్‌బీ డీఎస్పీ బాలరాజు, అటవీశాఖ అధికారి నిషాకుమారి, సెంట్రల్‌ ఇంటెలిజెన్స్‌ డీఎస్పీ కిశోర్‌, వాణిజ్యపన్నులశాఖ అధికారిణి రాణిమోహన్‌, తదితరులు పాల్గొన్నారు.