సంపద సృష్టిస్తాం.. పేదలకు పంచుతాం

తెదేపా మొదటి విడత ఎన్నికల మేనిఫెస్టో చూసి వైకాపా నేతలు విలవిల్లాడిపోతున్నారని ఆ పార్టీ శ్రీకాకుళం పార్లమెంట్‌ నియోజకవర్గ అధ్యక్షుడు కూన రవికుమార్‌ విమర్శించారు. జిల్లా పార్టీ కార్యాలయంలో గురువారం నిర్వహించిన విలేకర్ల సమావేశంలో ఆయన మాట్లాడారు.

Published : 02 Jun 2023 05:57 IST

తెదేపా పార్లమెంట్‌ నియోజకవర్గ అధ్యక్షుడు కూన రవికుమార్‌

మాట్లాడుతున్న రవికుమార్‌, చిత్రంలో ఇతర నేతలు

గుజరాతీపేట(శ్రీకాకుళం), న్యూస్‌టుడే: తెదేపా మొదటి విడత ఎన్నికల మేనిఫెస్టో చూసి వైకాపా నేతలు విలవిల్లాడిపోతున్నారని ఆ పార్టీ శ్రీకాకుళం పార్లమెంట్‌ నియోజకవర్గ అధ్యక్షుడు కూన రవికుమార్‌ విమర్శించారు. జిల్లా పార్టీ కార్యాలయంలో గురువారం నిర్వహించిన విలేకర్ల సమావేశంలో ఆయన మాట్లాడారు. సంపద ఎలా తీసుకొస్తారని వైకాపా నాయకులు ప్రశ్నిస్తున్నారని, చంద్రబాబు సంపద సృష్టికర్త అనే విషయం వాళ్లకి తెలియదన్నారు. తాము సంపద సృష్టించి పేదలకు పంచుతామని చెప్పారు. తెదేపా ప్రవేశపెట్టిన సంక్షేమ పథకాలకే ప్రస్తుతం పేర్లు మార్చి అమలు చేస్తున్నారన్నారు. వైకాపా వచ్చిన తర్వాత పేరు మార్పిడి పథకం కాకుండా కొత్తగా ఏం చేశారో చెప్పాలని డిమాండ్‌ చేశారు. అమరావతి నిర్మాణం జరిగి ఉంటే ఇప్పుడు లక్ష కోట్ల సంపద వచ్చి ఉండేదని, చేతకాని ప్రభుత్వం అమరావతిని మట్టి దిబ్బలా వదిలేసిందన్నారు. ఆమదాలవలస నియోజకవర్గంలో 500 మందికిపైగా తల్లుల ఖాతాల్లో అమ్మఒడి నగదు జమ కాలేదని, దీన్ని కలెక్టర్‌ దృష్టికి తీసుకెళితే పట్టించుకోలేదని విమర్శించారు. 2014లో తెదేపా ప్రభుత్వం 134 పథకాలు అమలు చేస్తే వైకాపా అందులో 100 రద్దు చేసి కేవలం 34 పథకాలు ఇస్తోందన్నారు. తెదేపా నగర అధ్యక్షుడు మాదారపు వెంకటేష్‌, పార్టీ ఉపాధ్యక్షులు పీఎంజే బాబు, తోణంగి వెంకన్నయాదవ్‌, తెలుగురైతు రాష్ట్ర ప్రధాన కార్యదర్శి సింతు సుధాకర్‌, జంగమ సాధికార కమిటీ రాష్ట్ర డైరెక్టర్‌ విభూతి సూరిబాబు పాల్గొన్నారు.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.