‘సీపీఎస్‌ రద్దు చేయాల్సిందే’

నిరహార దీక్ష చేస్తున్న ప్రభుత్వ ఉద్యోగుల సంఘ నాయకులు

కాశీబుగ్గ, న్యూస్‌టుడే: సమస్యలు పరిష్కరించకుంటే ఉద్యమం తప్పదని రాష్ట్ర ప్రభుత్వ ఉద్యోగుల సంఘ నాయకులు స్పష్టం చేశారు. పలాసలో శుక్రవారం తహసీల్దారు కార్యాలయం వద్ద ఉద్యోగులు నిరాహార దీక్ష చేశారు. ఈ సందర్బంగా పలువురు మాట్లాడారు. ప్రతిపక్ష నేతగా ఉన్నప్పుడు జగన్‌మోహన్‌రెడ్డి ఇచ్చిన హామీ మేరకు సీపీఎస్‌ రద్దు చేయాలని డిమాండ్‌ చేశారు. ఒప్పంద, పొరుగు సేవల ఉద్యోగులను క్రమబద్ధీకరించాలన్నారు. 12వ వేతన సవరణ చేయాలని, ఒకటో తేదీ నాటికి జీతాలు చెల్లించాలని కోరారు. సంఘం జిల్లా కార్యదర్శి అలికాన రాజేశ్వరి, పలాస శాఖ అధ్యక్షుడు ఎన్‌.లక్ష్మీనారాయణ, అనురాధ, జీవన్‌దాస్‌, ప్రసాద్‌, శ్రీనివాస పండా తదితరులు పాల్గొన్నారు.