Shashikala- Vijayashanthi: శశికళతో విజయశాంతి రహస్య భేటీ?

సైదాపేట, న్యూస్‌టుడే: జయలలిత నెచ్చెలి శశికళతో భాజపా నాయకురాలు, ప్రముఖ నటి విజయశాంతి రహస్యంగా భేటీ అయినట్లు సమాచారం. ఈ సందర్భంగా తన తదుపరి రాజకీయ ప్రయాణం గురించి విజయశాంతిలో శశికళ సమగ్రంగా చర్చించినట్లు తెలుస్తోంది. ఇటీవల శశికళ తన మద్దతుదారుల ఇంట కార్యక్రమాల్లో పాల్గొంటున్నారు. అప్పుడు విలేకర్లను కలిసి మాట్లాడుతున్నారు. కొన్ని నెలల క్రితం ఆధ్యాత్మిక యాత్ర పేరుతో రాష్ట్ర వ్యాప్తంగా వివిధ ఆలయాలను సందర్శించారు. పలు చోట్ల మద్దతుదారులను కలిసి ఆ సమయంలో మాట్లాడారు. రాజకీయ ప్రయాణం మళ్లీ ప్రారంభిస్తానని, అన్నాడీఎంకేకు తాను నాయకత్వం వహించాలని కార్యకర్తలు కోరుకుంటున్నారని ఇటీవల ఆమె చెప్పారు. పలువురు అన్నాడీఎంకే నేతలు తనను సంప్రదిస్తున్నారని, కొంత మంది మాత్రమే వ్యతిరేకిస్తున్నారని తెలిపారు. ఈ నేపథ్యంలో శశికళను విజయశాంతి రహస్యంగా కలవటం ప్రాధాన్యత సంతరించుకుంది. శశికళ జైలు నుంచి వచ్చిన తర్వాత విజయశాంతి కలిశారు. తాజా భేటీలో శశికళ రాజకీయ భవిష్యత్‌ గురించి చర్చించినట్లు సమాచారం. జయలలిత మృతి అనంతరం అన్నాడీఎంకేను భాజపా నియంత్రిస్తోందనే ఆరోపణలు ఉన్నాయ. గత అసెంబ్లీ ఎన్నికల సమయంలోనే అన్నాడీఎంకే నుంచి బయటకు వెళ్లిన వారిని మళ్లీ పార్టీలోకి తెచ్చేందుకు యత్నాలు జరిగాయి. అయితే ఎడప్పాడి పళనిస్వామితో సహా సీనియర్‌ నేతలు ససేమిరా అనటంతో అవి ఫలించలేదు. ఈ నేపథ్యంలో 2024 లోక్‌సభ ఎన్నికలను దృష్టిలో ఉంచుకుని మళ్లీ అన్నాడీఎంకే నుంచి వెళ్లిపోయిన వారిని పార్టీలో చేర్చే యత్నాల్లో భాజపా ఉన్నట్లు సమాచారం. ఇందులో భాగంగానే విజయశాంతి తాజాగా శశికళను కలిసినట్లు రాజకీయ వర్గాల సమాచారం.