వైభవంగా ముగిసిన వసంతోత్సవాలు

అలంకరణలో లక్ష్మి సరస్వతి సమేత కామాక్షి అమ్మవారు

కాంచీపురం, న్యూస్‌టుడే: కామాక్షి అమ్మవారి ఆలయంలో ఈనెల 15 నుంచి మూడు రోజుల పాటు నిర్వహించిన వసంతోత్సవాలు మంగళవారం రాత్రి ముగిశాయి. వేసవి ఉక్కపోత నుంచి అమ్మ వారికి ఉపశమనం కల్గించే విధంగా ఏటా మూడు రోజుల పాటు వసంతోత్సవాలను నిర్వహించడం ఆనవాయితీ. ఉత్సవాల్లో భాగంగా లక్ష్మి సరస్వతి సమేత కామాక్షి అమ్మవారి ఉత్సవమూర్తులకు అభిషేక ఆరాధనలు నిర్వహించి అమ్మవారిని అలంకరించి ఆలయ ప్రాంగణంలో ఉన్న వసంత మంటపంలో పుష్పాభిషేకం నిర్వహించారు. వసంతోత్సవాల ముగింపు సందర్భంగా మంగళవారం కామాక్షి అమ్మవారి ఉత్సవమూర్తులను అలంకరించి ఆలయ పరిసరాల్లోని నాలుగు మాడవీధుల్లో ఊరేగించారు. అనంతరం వసంతమంటపానికి తీసుకువచ్చి దీపారాధన నిర్వహించారు.