పేదల సంక్షేమమే ప్రభుత్వ ధ్యేయం

మహిళలు తయారు చేస్తున్న నూలు సంచులను పరిశీలిస్తున్న మంత్రి నాజర్‌

తిరువళ్ళూరు, న్యూస్‌టుడే: రాష్ట్రంలోని పేదల సంక్షేమమే ధ్యేయంగా ప్రభుత్వం ముందడుగు వేస్తోందని పాడిపరిశ్రమ శాఖ మంత్రి నాజర్‌ పేర్కొన్నారు. తిరువళ్ళూరు జిల్లా పూందమల్లి యూనియన్‌లో డీఆర్‌డీఏ పథకాల ప్రారంభ కార్యక్రమాలు శనివారం జరిగాయి. కలెక్టర్‌ ఆల్పిజాన్‌వర్గీస్‌ ఆధ్వర్యంలో మంత్రి నాజర్‌ హాజరై నేమంలో రూ.37 లక్షలతో ఏర్పాటు చేసిన నూలు సంచుల తయారీ కేంద్రాన్ని ప్రారంభించారు. అనంతరం కుత్తంబాక్కం పెరియార్‌ సమత్వపురంలోని పక్కా గృహాలకు రూ.5.08 కోట్లు వ్యయంతో మరమ్మతులు, ఆధునికీకరణ పనులకు శంకుస్థాపన చేశారు. కార్యక్రమంలో పూందమల్లి ఎమ్మెల్యే కృష్ణస్వామి, డీఆర్‌డీఏ అధికారి జయకుమార్‌, గ్రామ పంచాయతీల డైరెక్టర్‌ సుధ తదితరులు పాల్గొన్నారు.