రెండు రైల్వే స్టేషన్లలో బ్రెయిలీ లిపి మ్యాప్‌ సూచికలు

వడపళని, న్యూస్‌టుడే: అంధుల కోసం ప్రత్యేకంగా బ్రెయిలీ లిపిలో రూపొందించిన మ్యాపుల సూచికలను చెన్నై సెంట్రల్‌, ఎగ్మూరు స్టేషన్లలో ఏర్పాటు చేశారు. చెన్నై డివిజన్‌లో కార్పొరేట్‌ సోషియల్‌ రెస్పాన్సిబులిటీ (సీఎస్సార్‌) పథకంలో భాగంగా రెనాల్ట్‌ నిస్సాన్‌, స్టాండర్డ్‌ ఛార్టర్డ్‌ బ్యాంకుల సహకారంతో వీటిని ఏర్పాటు చేసినట్టు దక్షిణ రైల్వే సోమవారం ఒక ప్రకటన విడుదల చేసింది. టిక్కెట్టు కౌంటర్లు, నీళ్ల కొళాయిలు, మరుగుదొడ్లు, వేచి ఉండే గదులు వంటి వివరాలు తెలుసుకోవచ్చన్నారు. బ్రెయిలీ లిపిలో క్యూఆర్‌ కోడ్‌ల సౌకర్యం కూడా కల్పించారు. స్మార్ట్‌ ఫోన్ల ద్వారా స్కాన్‌ చేసుకోవచ్చని, వారికి ఆడియో సందేశం అందుతుందని చెప్పారు. తాంబరం, చెంగల్పట్టు, అరక్కోణం, కాట్పాడి స్టేషన్లలో కూడా ఈ వసతి కల్పిస్తామని తెలిపారు.