పళని కొండపైకి రైలు సేవలు

రైలుపై సౌర విద్యుత్తు పలకలు అమర్చిన దృశ్యం

విల్లివాక్కం, న్యూస్‌టుడే: పళని దండాయుధపాణి ఆలయ కొండపైకి విద్యుత్తు రైలు సేవలు బుధవారం అందుబాటులోకి వచ్చాయి. కొండ కింది నుంచి పైకి మూడు విద్యుత్తు రైళ్లు నడుస్తున్నాయి. ఈ రైళ్లలో విద్యుత్తు దీపాలు, ఫ్యాన్‌లు, భక్తి పాటలు వినిపించడానికి స్పీకర్లు ఉన్నాయి. ఇవి పనిచేయడానికి గతేడాది ఓ రైలు పైభాగంలో సౌర విద్యుత్తు పలకలు అమర్చారు. ప్రస్తుతం రెండో రైలుకు కూడా ఏర్పాటు చేశారు. దీనిని బుధవారం నుంచి భక్తులకు అందుబాటులోకి తీసుకొచ్చారు. ఆలయంలో వచ్చే ఏడాది జనవరిలో కుంభాభిషేకం నిర్వహించనున్నారు. ఇందుకుగాను బాలాలయ పనులు పూర్తయ్యాయి. ఆలయంలో మరమ్మతులు చేసి సుందరంగా తీర్చిదిద్దుతున్నారు. మూలవిరాట్టు సన్నిధి చుట్టూ రూ.కోటి వ్యయంతో 10 టన్నుల ఇత్తడితో గ్రిల్‌ ఏర్పాటు చేస్తున్నారు.