దిండిగల్లులో పటిష్ట పోలీసు భద్రత

విధుల్లో పోలీసులు

విల్లివాక్కం, న్యూస్‌టుడే: చట్ట వ్యతిరేక కార్యకలాపాలు కొనసాగిస్తుందన్న కారణంతో పాపులర్‌ ఫ్రంట్‌ ఆఫ్‌ ఇండియా సంస్థపై కేంద్ర ప్రభుత్వం ఐదేళ్లపాటు నిషేధం విధించింది. ఈ సంస్థతో సంబంధం ఉన్న మరో 8 సంస్థలకు కూడా ఐదేళ్లు నిషేధం విధించింది. ఈ క్రమంలో దిండిగల్లు కుడైప్పారైపట్టికి చెందిన భాజపా నిర్వాహకుడి వాహన గోదాముకు దుండగులు నిప్పంటించిన ఘటన జరిగిన తర్వాత ఆ ప్రాంతంలో పోలీసు భద్రతను పటిష్టం చేశారు. ఈ నేపథ్యంలో జిల్లాలో ఎలాంటి అవాంఛనీయ సంఘటనలు చోటుచేసుకోకుండా అప్రమత్తంగా వ్యవహరించాలని అన్ని పోలీసు స్టేషన్లకు ఉన్నతాధికారుల నుంచి సర్క్యులర్లు అందాయి. ఆ మేరకు పోలీసులు సెలవు తీసుకోకుండా విధులకు హాజరుకావాలని సూచించారు. బస్టాండ్‌, రైల్వే స్టేషన్‌ తదితర ప్రాంతాలలో అదనపు భద్రతను ఏర్పాటు చేశారు. ముఖ్యమైన ప్రాంతాలతో పోలీసుల నిఘాను పకడ్బంధీగా అమలు చేయనున్నట్లు జిల్లా పోలీసు వర్గాలు బుధవారం తెలిపాయి.