లారీ ఢీకొని తెగిపడిన విద్యుత్తు తీగలు

గిండి, న్యూస్‌టుడే: రైల్వే లెవెల్‌ క్రాసింగ్‌ వద్ద లారీ ఢీకొని రైల్వే విద్యుత్తు తీగలు తెగిపడ్డాయి. కుంభకోణం నుంచి మైలాడుదురై వెళ్లే మార్గంలో ఆడుదురై-తరంగంబాడి ప్రాంతం వద్ద రైల్వే లెవల్‌ క్రాసింగ్‌ ఉంది. మనల్‌మేడు ప్రాంతానికి చెందిన కార్తీక్‌ లారీ డ్రైవరు. ఇతను లెవల్‌ క్రాసింగ్‌ వద్ద ముందు వెళుతున్న మరో లారీని దాటి వెళ్లేందుకు ప్రయత్నించాడు. ఈ క్రమంలో లారీ పైభాగం పైన ఉన్న విద్యుత్తు తీగలకు తగిలి తెగిపడ్డాయి. వెంటనే విద్యుత్‌ సరఫరా నిలిచిపోవడంతో ప్రాణనష్టం తప్పింది. సమాచారం మేరకు రైల్వే ఇంజినీరింగ్‌ సిబ్బంది అక్కడకు చేరుకుని తీగలను సరిచేశారు. ఈ కారణంగా ఆ మార్గంలో పలు రైళ్లు ఆలస్యంగా నడిచాయి.