మహిళలకు రూ.వెయ్యి పథకం ప్రారంభం

పథకాన్ని ప్రారంభిస్తున్న తమిళిసై, రంగస్వామి

చెన్నై, న్యూస్‌టుడే: పుదుచ్చేరిలో దారిద్య్రరేఖకు దిగువనున్న, కుటుంబ పెద్దగా ఉన్న 21 ఏళ్ల నుంచి 55 ఏళ్లలోపు మహిళలకు ప్రతినెల రూ.వెయ్యి ఆర్థిక సాయం అందజేత పథకం ప్రారంభోత్సవ కార్యక్రమం కదిర్‌గామంలోని ప్రభుత్వ మహోన్నత పాఠశాలలో జరిగింది. ప్రభుత్వ మహిళా, బాలికల అభివృద్ధిశాఖ తరఫున జరిగిన కార్యక్రమంలో ఇన్‌ఛార్జి లెఫ్టినెంట్‌ గవర్నర్‌ తమిళిసై సౌందరరాజన్‌, ముఖ్యమంత్రి రంగస్వామి, సభాపతి సెల్వం పాల్గొని పథకాన్ని ప్రారంభించారు. తొలి విడతగా 70 వేల మంది ఈ పథకంతో లబ్ధి పొందుతారని రంగస్వామి తెలిపారు. మహిళల పేరిట ఆస్తి కొనుగోలు చేస్తే స్టాంపు పత్రాల్లో 50 శాతం సబ్సిడీని ప్రభుత్వం అమలు చేస్తోందని పేర్కొన్నారు. కార్యక్రమంలో మంత్రులు తదితరులు పాల్గొన్నారు.