మూగబోయిన సుస్వరాల ‘వాణి’

కోడంబాక్కం, న్యూస్‌టుడే: ఏ పాటైనా తన ప్రత్యేకతను చాటుకున్నారు... పద్మవిభూషణ్‌  స్థాయికి ఎదిగారు.. పురస్కారం స్వీకరించకముందే కన్నుమూశారు ప్రముఖ సినీ గాయని వాణీ జయరామ్‌. చెన్నైలో శనివారం ఆమె అందరి నుంచి శాశ్వత వీడ్కోలు తీసుకున్నారనే విషయం తెలిసి అభిమానులు విషాదంతో మునిగారు. పలువురు సినీ ప్రముఖులు ఆమెకు నివాళులు అర్పించారు.   మంచం నుంచి జారిపడి గాయాలైనందువల్లే ఆమె  కన్నుమూసినట్లు పోలీసులు చెబుతున్నారు. దర్యాప్తు కొనసాగుతోంది.  సినీ, సంగీత ప్రముఖులు సంతాపం వ్యక్తం చేశారు. ఆమె లేని లోటు తీరనిదన్నారు.

ప్రముఖుల సంతాపం

చెన్నై, న్యూస్‌టుడే: గాయని వాణీ జయరామ్‌ మృతికి సీఎం స్టాలిన్‌ తదితరులు సంతాపం వ్యక్తం చేశారు. స్టాలిన్‌ తన సందేశంలో... భారత చలనచిత్ర రంగంలో సంగీత కోకిలగా విరాజిల్లిన కలైవాణి అలియాస్‌ వాణీ జయరామ్‌ మృతి ఆవేదన కలిగించిందని తెలిపారు. వేలూరులో పుట్టి ప్రపంచవ్యాప్తంగా తన మధుర గానంతో ప్రసిద్ధి గాంచారని పేర్కొన్నారు. తమిళం తదితర 19 భాషల్లో 10 వేలకుపైగా అద్భుత పాటలు పాడి అభిమానుల మనసులో చెరగని స్థానం పొందారని తెలిపారు. ఇటీవల ఆమెకు పద్మభూషణ్‌ పురస్కారాన్ని ప్రకటించినప్పుడు శుభాకాంక్షలు చెప్పానని గుర్తు చేసుకున్నారు. ఆ పురస్కారాన్ని స్వీకరించడానికి ముందే ఈ లోకాన్ని వీడటం బాధాకరమని తెలిపారు. ఆమె మృతి సంగీత లోకానికి తీరని లోటు అన్నారు. ఆమెను కోల్పోయిన కుటుంబ సభ్యులు, అభిమానులకు ప్రగాఢ సానుభూతి తెలిపారు. వాణీ జయరామ్‌ మరణవార్త దిగ్భ్రాంతి కలిగించిందని రాష్ట్ర సమాచారశాఖ మంత్రి స్వామినాథన్‌ తెలిపారు. తమిళంతోపాటు తెలుగు, మలయాళం, హిందీ, కన్నడం తదితర పలు భాషాల్లో 1 0వేలకుపైగా పాటలు పాడి ప్రత్యేక ముద్ర వేశారన్నారు. ఆమెను ‘సప్తస్వరాల గాన సరస్వతి’గా అభిమానులు పిలుచుకున్నారని తెలిపారు. ఆమె ‘అపూర్వ రాగంగళ్‌’, ‘శంకరాభరణం’, ‘స్వాతికిరణం’ చిత్రాలకుగాను జాతీయ పురస్కారాలు పొందారని పేర్కొన్నారు.

దర్యాప్తు చేసి వెళుతున్న ఫోరెన్సిక్‌ అధికారులు