బాలికను బడిలో తిరిగి చేర్చిన డీఎస్పీ

మాయవన్‌తో తామరైకని

ఆర్కేనగర్‌, న్యూస్‌టుడే: పేదరికం కారణంగా చదువు ఆపేసి కూలి పనులకు వెళ్తున్న విద్యార్థినిని తిరిగి పాఠశాలలో చేర్చిన డీఎస్పీని పలువురు అభినందిస్తున్నారు. తత్తుకుడి జిల్లా శ్రీవైకుంఠం సమీపంలోని అళ్వాతిరునగర్‌కు చెందిన లోకనాథన్‌ కార్మికుడు. ఆయన భార్య మృతి తర్వాత కుమార్తె తామరైకని కూలి పనులకు వెళ్లాల్సి వచ్చింది. అప్పటివరకు నజరేత్‌లోని పాఠశాలలో తొమ్మిదో తరగతి చదివిన ఆమె పరిస్థితి గురించి పోలీసులు తెలుసుకున్నారు. దీంతో ఆమెను డీఎస్పీ మాయవన్‌ తిరిగి బడికి పంపారు. ఇప్పటికే కరుంగులం ప్రాంతానికి చెందిన విద్యార్థి టీదుకాణంలో పనిచేస్తున్న విషయం తెలిసి పాఠశాలకు పంపడం గమనార్హం.