లైంగిక వేధింపుల ఆరోపణలపై రహస్య విచారణ

విద్యార్థినుల ఆందోళన

ప్లకార్డులతో ర్యాలీగా వెళ్తున్న విద్యార్థినులు

ప్యారిస్‌, న్యూస్‌టుడే: లైంగిక వేధింపుల ఫిర్యాదుల గురించి జాతీయ మహిళా కమిషన్‌ అధ్యక్షురాలు కళాక్షేత్రంలో రహస్యంగా విచారణ జరపడంతో ఉద్రిక్తత నెలకొంది. అడయారు కళాక్షేత్రంలో ప్రొఫెసరు లైంగిక వేధింపులకు పాల్పడుతున్నట్లు విద్యార్థినులు సామాజిక మాధ్యమాల్లో మాట్లాడుకున్నారు. విషయం తెలుసుకున్న జాతీయ మహిళా కమిషన్‌.. రాష్ట్ర డీజీపీ విచారించాలని నోటీసు పంపింది. ఈ నేపథ్యంలో కళాక్షేత్రానికి చెందిన విద్యార్థిని తన పేరుని కావాలనే ఉపయోగించి లైంగిక వేధింపుల ఆరోపణలు చేశారని, ఈ విషయమై చర్యలు చేపట్టాలని పోలీసులకి ఫిర్యాదు చేసింది. దీంతో జాతీయ మహిళా కమిషన్‌ డీజీపీకి పంపిన నోటీసుని వెనక్కి తీసుకుంది. ఈ నేపథ్యంలో అడయారు కళాక్షేత్రంలో గురువారం 3 గంటల పాటు జాతీయ మహిళా కమిషన్‌ అధ్యక్షురాలు రేఖశర్మ రహస్యంగా విచారణ జరిపారు. ఎలాంటి ముందస్తు సమాచారం ఇవ్వకుండా విద్యార్థుల వద్ద విచారణ జరిపినట్లు తెలుస్తోంది. జాతీయ మహిళా కమిషన్‌ సభ్యురాలు ఖుష్బూని కూడా తీసుకెళ్లకుండా కమిషన్‌ అధ్యక్షురాలు విచారణ జరపడం పలు అనుమానాలకు దారితీస్తోంది. ఈ నేపథ్యంలో లైంగిక వేధింపుల ఆరోపణలు ఎదుర్కొంటున్న అసిస్టెంటు ప్రొఫెసరుని సస్పెండు చేయాలని డిమాండ్‌ చేస్తూ విద్యార్థినులు గురువారం ఆందోళన చేపట్టారు. కళాక్షేత్రం ఫౌండేషన్‌ డైరెక్టరు రేవతి రామచంద్రన్‌ విద్యార్థినులతో చర్చించినా ఆందోళన విరమించలేదు.