సెంథిల్‌బాలాజీని అరెస్టు చేయాలి

ప్రేమలత విజయకాంత్

ఆర్కేనగర్‌, న్యూస్‌టుడే: మంత్రి సెంథిల్‌బాలాజీని అరెస్ట్‌ చేయాలని డీఎండీకే కోశాధికారి ప్రేమలత విజయకాంత్‌ అన్నారు. కులదైవాన్ని దర్శించుకునేందుకు చెన్నై నుంచి మదురై విమానాశ్రయానికి విచ్చేసిన ఆమె విలేకరులతో మాట్లాడుతూ.... మల్లయుద్ధ క్రీడాకారిణిలు పోరాడుతూనే ఉన్నారన్నారు. ఇండియా కోసం ఆడిన క్రీడాకారిణిలకు ఎలాంటి భద్రత లేదన్నారు. వారి శాఖకు చెందినవారి ద్వారా లైంగిక వేధింపులకు గురిచేయడం ఖండించదగినదని తెలిపారు. వారికి మంచి తీర్పునివ్వాలన్నారు. మెగదాటు ఆనకట్ట నిర్మించేందుకు ఏ తమిళుడు అనుమతించడని అన్నారు. ఈ వ్యవహారంలో ఇరు రాష్ట్రాల మధ్య అతిపెద్ద ఘర్షణ ఏర్పడుతుందని చెప్పారు. సోదాలకు వచ్చే అధికారులు చెప్పిరారని అన్నారు. అధికారులపై దాడి చేయడాన్ని ఖండించదగినదన్నారు. ఈ వ్యవహారంలో మంత్రి సెంథిల్‌బాలాజీని అరెస్ట్‌ చేయాలని పేర్కొన్నారు. అధికారులు విధులు నిర్వహించకుండా అడ్డుకున్న వారికి ఇది ఒక గుణపాఠంగా ఉండాలన్నారు. రూ.వెయ్యి కోట్లు పెట్టుబడులు తీసుకొచ్చినట్లు ముఖ్యమంత్రి అన్నారని, ఈ విషయంలో జిల్లాలకు ఎన్ని పరిశ్రమలు, ఉద్యోగవకాశాలు వస్తాయో వేచిచూద్దామని అన్నారు.