పరాశక్తి రీరిలీజ్‌పై ప్రభు హర్షం

ప్రభుకు శాలువా కప్పి సత్కరిస్తున్న కనిమొళి

కోడంబాక్కం, న్యూస్‌టుడే: మూఢనమ్మకాలనే చీకట్లను చీల్చుకుంటూ కరుణానిధి కలం నుంచి జాలువారిన పదునైన మాటలతో తెరకెక్కిన చిత్రం ‘పరాశక్తి’. శివాజీ గణేశన్‌ హీరోగా నటించిన ఈ చిత్రం అప్పట్లో సంచలనాత్మకంగా నిలిచింది. 1952లో విడుదలైన ఈ సినిమాను ఇప్పుడు కరుణానిధి శతజయంతి సందర్భంగా రీరిలీజ్‌ చేశారు. చెన్నైలోని ఉడ్‌ల్యాండ్స్‌లో జరిగిన ఈ ప్రత్యేక కార్యక్రమంలో శివాజీ గణేశన్‌ కుమారుడు, నటుడు ప్రభు, ఎంపీ కనిమొళి ముఖ్య అతిథులుగా పాల్గొన్నారు. ఈ సందర్భంగా ప్రభుకు డీఎంకే మహిళా విభాగం ఆధ్వర్యంలో సన్మానం చేశారు. ప్రభు మాట్లాడుతూ.. ‘పరాశక్తి చిత్రం మళ్లీ విడుదలవడం చాలా ఆనందంగా ఉంది. ఇందులోని మాటలు, నటించిన నాన్న ఇద్దరూ గొప్పవారే. ఈ చిత్రబృందాన్ని ఎప్పటికీ మరిచిపోలేమ’ని పేర్కొన్నారు.