క్షమాపణ చెప్పబోను: అన్నామలై

మాట్లాడుతున్న అన్నామలై

కోయంబత్తూరు, న్యూస్‌టుడే: దివంగత ముఖ్యమంత్రి అన్నాదురైపై తాను చేసిన వ్యాఖ్యలపై క్షమాపణ చెప్పబోనని భాజపా రాష్ట్ర అధ్యక్షుడు అన్నామలై స్పష్టం చేశారు. అన్నాదురై స్వాతంత్య్ర సమరయోధుడు పసుంపొన్‌ మత్తురామలింగదేవర్‌ను ఓ వ్యవహారానికి సంబంధించి క్షమాపణ కోరారని అన్నామలై ఇటీవల ఓ సమవేశంలో ప్రస్తావించారు. ఇది రాష్ట్ర రాజకీయ వర్గాల్లో పెనుదుమారం రేపింది. భాజపాతో అన్నాడీఎంకే కూటమి లేదని అన్నాడీఎంకే మాజీ మంత్రి జయకుమార్‌ రెండు రోజుల క్రితం ప్రకటించారు. ఈ నేపథ్యంలో అన్నామలై కోయంబత్తూరులో గురువారం విలేకరులతో మాట్లాడారు. తాను క్షమాపణ చెప్పాలని అన్నాడీఎంకే నేతలు చేస్తున్న డిమాండులో అర్థం లేదన్నారు. తనకు అన్నాడీఎంకే నేతలతో తగవు లేదని, వారు తనపై బురద చల్లితే సహించబోనని స్పష్టం చేశారు.