చెరకు రైతుల బకాయిలు చెల్లించేలా చూడాలి

నక్కపల్లి, న్యూస్‌టుడే: జిల్లాలోని నాలుగు చక్కెర కర్మాగారాల్లో రైతులకు రావల్సిన బకాయిలు తక్షణమే చెల్లించేలా రాష్ట్ర ప్రభుత్వంపై ఒత్తిడి తేవాలని భాజపా రాష్ట్ర అధ్యక్షుడు సోము వీర్రాజును కోరినట్లు రాష్ట్ర కార్యవర్గ సభ్యుడు తోట నగేష్‌ తెలిపారు. విజయవాడలో శనివారం వీర్రాజును కలిసిన ఆయన ఈమేరకు వినతిపత్రం అందించారు. ఈ వివరాలను పేటలో విలేకరులకు తెలిపారు. తాండవ, ఏటికొప్పాక కర్మాగారాలు మూతపడేలా ఉన్నాయని, ఇదే జరిగితే రైతులు అన్యాయమవుతారని పేర్కొన్నారు. తక్షణమే వారికి రావాల్సిన బకాయిలు ఇవ్వడంతో పాటు, కర్మాగారాల మనుగడ కొనసాగేలా పార్టీ తరఫున ప్రభుత్వంతో మాట్లాడాలన్నారు. దీనిపై విజయవాడలో జరుగుతున్న పార్టీ కార్యవర్గ సమావేశంలో తీర్మానం చేయించినట్లు పేర్కొన్నారు.