992 కేజీల గంజాయి స్వాధీనం

సంగారెడ్డి అర్బన్‌, నూస్‌టుడే: ఎండు గంజాయిని అక్రమంగా రవాణా చేస్తుండగా సంగారెడ్డి జిల్లా సదాశివపేట పట్టణ పోలీసులు పట్టుకున్నారు. సీఐ సంతోష్‌కుమార్‌ తెలిపిన వివరాలు.. విశాఖపట్టణం నుంచి మహారాష్ట్రకు సంగారెడ్డి మీదుగా లారీలో గంజాయిని తరలిస్తుండగా సదాశివపేట బైపాస్‌ రోడ్డులో ఆదివారం రాత్రి పట్టుకున్నారు. విశ్వసనీయ సమాచారం మేరకు లారీని తనిఖీ చేసి 992 కిలోల ఎండు గంజాయిని, లారీని స్వాధీనం చేసుకున్నారు. దీని విలువ రూ.99 లక్షలు ఉంటుందని పోలీసులు చెప్పారు. నిందితుల పూర్తి వివరాలు సోమవారం వెల్లడించే అవకాశం ఉంది.