అడ్డొచ్చిన కుక్క.. నిండుప్రాణం బలి

అచ్యుతాపురం, న్యూస్‌టుడే: సెజ్‌ రోడ్డులో జరిగిన ప్రమాదంలో గాయపడిన అభిజీత్‌ ఫెర్రో అల్లాయిస్‌ కంపెనీ సీనియర్‌ మేనేజరు నర్రెడ్డి రాజశేఖర్‌రెడ్డి (62) సోమవారం మృతి చెందారు. ఆదివారం ఉదయం విధులకు హాజరైన ఆయన మధ్యాహ్నం భోజనం చేసేందుకు ద్విచక్ర వాహనంపై అచ్యుతాపురం వచ్చారు. భోజనం ముగించుకొని తిరిగి కంపెనీకి వెళ్తుండగా.. మహాలక్ష్మి పెట్రోల్‌ బంకు సమీపంలో అడ్డుగా వస్తున్న కుక్కను తప్పించే క్రమంలో బైకు అదుపుతప్పి రాజశేఖర్‌రెడ్డి కిందపడి తీవ్రంగా గాయపడ్డారు. భోజనానికి వెళ్లేప్పుడు శిరస్త్రాణం పెట్టుకున్న ఆయన తిరిగి వచ్చేప్పుడు పెట్టుకోలేదు. తలకు బలమైన గాయం కావడంతో కంపెనీ ప్రతినిధులు అనకాపల్లిలోని ప్రైవేటు ఆసుపత్రికి తరలించారు. చికిత్స పొందుతూ సోమవారం ఉదయం మృతి చెందారు. 2011 నుంచి అభిజీత్‌ ఫెర్రో కంపెనీలో సీనియర్‌ మేనేజర్‌గా పనిచేస్తున్నారని హెచ్‌ఆర్‌ మేనేజరు అప్పలనాయుడు పేర్కొన్నారు.