ప్రధాన రహదారులు..మూసివేస్తాం

మంగళవారం రాత్రి నుంచి కర్ఫ్యూ అమలు: సీపీ

మాట్లాడుతున్న సీపీ మనీష్‌కుమార్‌ సిన్హా, చిత్రంలో డీసీపీ గౌతమి సాలి

ఎం.వి.పి.కాలనీ, న్యూస్‌టుడే: కొవిడ్‌ ఉద్ధృతి నేపథ్యంలో రాష్ట్ర ప్రభుత్వ ఆదేశాల మేరకు మంగళవారం నుంచి రాత్రి కర్ఫ్యూ పకడ్బందీగా అమలు జరుగుతుందని నగర పోలీసు కమిషనర్‌ మనీష్‌కుమార్‌ సిన్హా వెల్లడించారు.

*● మంగళవారం సాయంత్రం ఆర్కేబీచ్‌ వద్ద ఏర్పాటు చేసిన విలేకరుల సమావేశంలో డీసీపీ గౌతమి సాలితో కలిసి విలేకరులతో మాట్లాడారు. రాత్రి 11 నుంచి తెల్లవారుజాము 5 గంటల వరకు కర్ఫ్యూ అమలు జరుతుందన్నారు. ఈ సమయంలో ప్రధాన *రహదారులను మూసివేస్తామన్నారు. అత్యవసర సేవలు, ఇతర రాష్ట్రాలకు చెందిన రవాణా వాహనాలు, రాత్రి సమయంలో ప్రయాణించే ఆర్టీసీ బస్సులకు మాత్రమే అనుమతులు ఉంటాయన్నారు.

*● బీఆర్‌టీఎస్‌, తెలుగుతల్లి ఫ్లైఓవర్‌ రహదారులను బారికేడ్లతో మూసివేస్తారన్నారు. ఇతర రాష్ట్రాల నుంచి వచ్చిన ప్రయాణికులను పరిశీలించి పంపిస్తామని.. వారికి ఎలాంటి ఇబ్బందులు ఉండవన్నారు. వారాంతపు సెలవుల్లో బీచ్‌రోడ్డుల్లో ప్రవేశాలు, ఇతర ఆంక్షలపై సమీక్షిస్తామన్నారు.

*● రాత్రి 10 గంటల నుంచే బీచ్‌రోడ్డులో ప్రవేశాలు ఉండవన్నారు. కర్ఫ్యూ సమయంలో ఆంక్షలు ధిక్కరించిన వారిపై కేసులు తప్పవన్నారు. పగలు కూడా మాస్క్‌ ధరించని వారికి జరిమానా విధిస్తామన్నారు.

● * కమిషనరేట్‌ పరిధిలో పనిచేస్తున్న పోలీసు సిబ్బందికి రెండో డోసు వేసి 9 నెలలు పూర్తయితే బూస్టర్‌ డోస్‌ వేస్తున్నామన్నారు.