వన్‌టౌన్‌, న్యూస్‌టుడే: తెదేపా వ్యవస్థాపకులు ఎన్‌టీఆర్‌ ఆశయాలే పార్టీ శ్రేణులకు స్ఫూర్తిగా నిలుస్తున్నాయని మాజీ మంత్రి, విశాఖ ఉత్తరం ఎమ్మెల్యే గంటా శ్రీనివాసరావు అన్నారు. ఎన్టీఆర్‌ వర్ధంతిని మంగళవారం తెదేపా కార్యాలయ ఆవరణలో, బీచ్‌రోడ్డులో నిర్వహించారు. పార్టీ కార్యాలయంలో రక్తదాన శిబిరం ఏర్పాటు చేశారు. గంటా శ్రీనివాసరావు మీడియాతో మాట్లాడారు. తెలుగుజాతి ఖ్యాతిని ప్రపంచ నలుమూలలకు చాటిన ఘనత ఎన్టీఆర్‌కు దక్కుతుందన్నారు. అసెంబ్లీ ఎన్నికలకు చాలా సమయం ఉందని, పార్టీకి అత్యున్న విధాన నిర్ణాయక కమిటీ ఉందని, ఆ కమిటీ నిర్ణయాలకు అనుగుణంగా ముందుకెళతామన్నారు.

● తెదేపా విశాఖ లోక్‌సభ నియోజకవర్గ అధ్యక్షులు పల్లా శ్రీనివాసరావు మాట్లాడుతూ బడుగు, బలహీన వర్గాల అభ్యున్నతికి ఎన్‌టీఆర్‌ ఎంతో కృషి చేశారని, ఆయన ఆశయాలను ముందుకు తీసుకెళతామన్నారు. కార్యక్రమంలో ఎమ్మెల్సీ దువ్వారపు రామారావు, మాజీ ఎమ్మెల్యే గండిబాబ్జీ, నేతలు పాశర్ల ప్రసాద్‌, సిహెచ్‌.వి.పట్టాభిరామ్‌, వీఎస్‌ఎన్‌ మూర్తి యాదవ్‌, లొడగల కృష్ణ, పుచ్చా విజయకుమార్‌ పాల్గొన్నారు.