రెండేళ్ల తరువాత వినియోగంలోకి మొదటి యూనిట్‌

సీలేరు, న్యూస్‌టుడే: రెండేళ్ల తరువాత సీలేరు జలవిద్యుత్కేంద్రంలో మొదటి యూనిట్‌ వినియోగంలోకి వచ్చింది. సీలేరు జలవిద్యుత్కేంద్రంలో 60 మెగావాట్ల సామర్థ్యం గల మొదటి యూనిట్‌ 2019 డిసెంబరులో రోటార్‌ ఎర్త్‌ సమస్యతో మరమ్మతులకు గురైంది. దీంతో ఈ పనులను ఒక ప్రైవేటు ఇంజినీరింగ్‌ కంపెనీకి కాంప్లెక్స్‌ అధికారులు అప్పగించారు. సీఈగా బాధ్యతలు స్వీకరించిన వి.రాంబాబు సీలేరులో మకాం వేసి యూనిట్‌ మరమ్మతులపై ప్రత్యేక శద్ధ పెట్టారు. మంగళవారం రాత్రికి అన్ని మరమ్మతులు పూర్తిచేసి విద్యుదుత్పత్తిని ప్రారంభించారు. ఈ సందర్భంగా సీఈ వి.రాంబాబు ఇంజినీర్లు, సిబ్బందికి ప్రత్యేక అభినందనలు తెలిపారు.