ఆటో నుంచి జారిపడి యువకుడి మృతి

పరవాడ, న్యూస్‌టుడే: ఫార్మాసిటీ సమీపంలో లంకెలపాలెం ఏలేరు కాలువ వద్ద సోమవారం రాత్రి ఆటో నుంచి జారి పడి యువకుడు మృతి చెందాడు. పరవాడ సీఐ ఈశ్వరరావు తెలిపిన వివరాలు ఇలా ఉన్నాయి. ఒడిశా రాష్ట్రం, పద్మపూర్‌ జిల్లా ఉడార్‌ గ్రామానికి చెందిన ఫకీర్‌ బిస్వాల్‌(26) లంకెలపాలెం శివారు సింహాద్రినగర్‌లోని క్యాటరింగ్‌ విభాగంలో పనిచేస్తున్నాడు. ఫార్మాసిటీలోని కంపెనీలకు భోజనం సరఫరాచేయడానికి సోమవారం రాత్రి ఆటోలో వెళ్లారు. అనంతరం తిరిగి ఆటోలో లంకెలపాలెం వస్తున్న క్రమంలో ఏలేరు కాలువ వద్ద ఆటో చక్రాలు గుంతలో పడడంతో వెనుక కూర్చొన బిస్వాల్‌ రోడ్డుపై పోడిపోయాడు. తలకు తీవ్ర గాయాలు తగలడంతో కేజీహెచ్‌కు తరలించగా, అక్కడ చికిత్స పొందుతూ మంగళవారం ఉదయం మృతి చెందాడు. ఏఎస్సై సత్య శ్రీనివాస్‌ కేసు నమోదు చేసి దర్యాప్తు చేస్తున్నారు.