‘ఐఐపీఈ’కి 158 ఎకరాల అప్పగింత

ఈనాడు, విశాఖపట్నం:  విశాఖ ఐ.ఐ.పి.ఇ.(ఇండియన్‌ ఇన్‌స్టిట్యూట్‌ ఆఫ్‌ పెట్రోలియం అండ్‌ ఎనర్జీ)కి సబ్బవరం మండలం వంగలిలో కేటాయించిన 202 ఎకరాల భూమికిగానూ 158 ఎకరాలను జిల్లా రెవెన్యూ అధికారులు ఆ సంస్థకు అప్పగించారు. ఆ మేరకు మ్యూటేషన్‌ ప్రక్రియను పూర్తి చేశారు. భూమి కేటాయింపుపై జాప్యం జరుగుతున్న విషయాన్ని తెలుసుకుని రాజ్యసభ సభ్యుడు జి.వి.ఎల్‌.నరసింహారావు ఈ నెల ఆరో తేదీన విశాఖ జిల్లా కలెక్టర్‌తో భేటీ అయ్యారు. ఐ.ఐ.పి.ఇ.కి భూమి కేటాయించినప్పటికీ మ్యూటేషన్‌ పూర్తికాలేదని వివరించారు. ఆ భూమిలోకి వెళ్లడానికి ఐ.ఐ.పి.ఇ ప్రతినిధులకు ఇబ్బందికరంగా ఉందని, వెంటనే రెవెన్యూ విభాగ పరంగా తీసుకోవాల్సిన చర్యలు చేపట్టాలని కోరారు. ఈ నేపథ్యంలో ఈ నెల 17వ తేదీన ఆ ప్రక్రియలను అధికారులు పూర్తిచేశారు. ఈ నేపథ్యంలో ఐ.ఐ.పి.ఇ. డైరెక్టర్‌ ఆచార్య వి.ఎస్‌.ఆర్‌.కె.ప్రసాద్‌ అభినందన లేఖలను జి.వి.ఎల్‌.నరసింహారావుకు, జిల్లా కలెక్టర్‌కు, రెవెన్యూశాఖ ఉన్నతాధికారులకు పంపారు.