వ్యాన్‌ ఢీ: కూలీ దుర్మరణం

పాయకరావుపేట గ్రామీణం, న్యూస్‌టుడే: శ్రీరాంపురం కూడలిలో వ్యాన్‌ ఢీకొని వ్యవసాయ కూలీ మృతి చెందాడు. ఎస్సై సత్యనారాయణ కథనం ప్రకారం.. ఎస్‌.నర్సాపురానికి చెందిన గొర్ల శ్రీను (41), గోవింద్‌ ద్విచక్ర వాహనంపై వెళ్తుండగా వెనుక నుంచి వ్యాను ఢీకొంది. తీవ్రంగా గాయపడిన ఇద్దర్ని తుని ఆసుపత్రికి తరలిస్తుండగా శ్రీను మృతి చెందగా, గోవింద్‌ చికిత్స పొందుతున్నాడన్నారు. వ్యాన్‌ డ్రైవరు అజాగ్రత్త వల్లే ప్రమాదం జరిగినట్లు ప్రాథమిక విచారణలో వెల్లడైందని ఎస్సై చెప్పారు.

గుర్తుతెలియని ఒకరి మృతి

తుని పట్టణం, న్యూస్‌టుడే: తుని రైల్వే పోలీస్‌స్టేషన్‌ పరిధిలో పాయకరావుపేట నాగరాజుపేట గేటు వద్ద పట్టాలు దాటుతుండగా రైలు ఢీకొని గుర్తుతెలియని ఒకరు (40) మృతి చెందాడని జీఆర్పీ ఎస్సై అబ్దుల్‌ మారూఫ్‌ తెలిపారు. ప్రమాదంలో మృతదేహం ఛిద్రమైందని, మృతుని వివరాలు తెలియరాలేదన్నారు. ఎడమ చేతిపై అమ్మానాన్న అని పచ్చబొట్టు ఉందని, మరిన్ని వివరాలకు రైల్వేపోలీస్‌ స్టేషన్‌లో సంప్రదించాలన్నారు. మృతదేహాన్ని తుని ప్రభుత్వ ప్రాంతీయ ఆసుపత్రిలో భద్రపరిచామన్నారు.