ఇద్దరి చిన్నారులపై లైంగిక దాడి

చోడవరం పట్టణం, న్యూస్‌టుడే: అభం.. శుభం తెలియని ఇద్దరు చిన్నారులపై 14 ఏళ్ల బాలుడు లైంగిక దాడికి పాల్పడిన సంఘటన చోడవరంలో ఆలస్యంగా వెలుగుచూసింది. బాధిత కుటుంబసభ్యుల కథనం ప్రకారం.. ఈ నెల 17న 4, 6 ఏళ్ల వయస్సు గల బాలికలు ఇంటి సమీపంలో ఆడుకుంటున్నారు. అదే ప్రాంతంలో నివసిస్తున్న ఓ బాలుడు వీరిని తన ఇంటికి తీసుకుని వెళ్లి వారి పట్ల అసభ్యకరంగా ప్రవర్తించి లైంగిక దాడికి పాల్పడినట్లు బాధిత కుటుంబసభ్యులు ఆరోపిస్తున్నారు. చిన్నారుల్లో ఓ బాలిక జరిగిన విషయాన్ని ఆలస్యంగా తన తల్లికి చెప్పడంతో శనివారం బాధిత కుటుంబసభ్యులు, స్థానికులు ఆ బాలుడిని చెట్టుకు కట్టి దేహశుద్ధి చేశారు. అనంతరం పోలీసులను ఆశ్రయించారు. అదనపు ఎస్సై యమునా బాలికలతో పాటు వారి కుటుంబ సభ్యుల నుంచి వివరాలు సేకరిస్తున్నారు. బాలుడి అసభ్యకర ప్రవర్తనపై కేసు నమోదు చేసినట్లు ఎస్సై విభీషణరావు పేర్కొన్నారు.