పురుగుమందు తాగి యువకుడి ఆత్మహత్య

బాల (పాతచిత్రం)

శృంగవరపుకోట, న్యూస్‌టుడే: విజయనగరం జిల్లా ఎస్‌.కోట మండలంలోని కాపుసోంపురం గ్రామంలో పురుగు మందు తాగిన యువకుడు కొయిలాడ బాల (33) ఆత్మహత్యకు పాల్పడ్డాడు. ఎస్‌ఐ తారకేశ్వకరావు అందించిన వివరాల ప్రకారం.. అనకాపల్లి ప్రాంతానికి చెందిన ఇతను మూడేళ్ల క్రితం ఈ గ్రామంలో ఒకరి వద్ద పనిచేయడానికి వచ్చాడు. ఇటీవల హోటల్‌ ప్రారంభించాడు. ఏమైందో ఏమో ఈనెల 14న దుకాణంలోనే పురుగు ముందు తాగేశాడు. ఇతన్ని గమనించిన భార్య శార్వాణి వెంటనే ఆసుపత్రికి తీసుకువెళ్లింది. అయితే  పరిస్థితి విషమంగా ఉండడంతో మెరుగైన వైద్యానికి విశాఖ కేజీహెచ్‌కు తరలించారు. అక్కడే బాల చికిత్స పొందుతూ శనివారం సాయంత్రం మృతి చెందాడు. ఇతను లేఖ రాసి బలవన్మరణానికి పాల్పడ్డాడని, దీన్ని చేతిరాత నిపుణులకు పంపిస్తామని ఎస్‌ఐ తారకేశ్వరరావు చెప్పారు. దీనిపై భార్య ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నామన్నారు.